ORAS

                                

Oras... Huminto ang oras nang masilayan ka

Tila ang mundo’y tumigil pansamantala

Tanging ikaw lang ang aking nakikita

Parang isang anghel sa aking mga mata.

Oras... Hinihintay ang oras na sa aki’y lumapit ka

Tila segundo lang, ika’y nasa harap ko na

Sinabi mo sa aking nais mong makipagkaibigan

Pumayag naman ako ng walang pag-aalinlangan.

Oras... Tumakbo ang oras at hindi rin nagtagal

Ipinagtapat mo sa akin ang iyong pagmamahal

Labis ang galak, nagpasalamat sa Maykapal,

Sapagkat ikaw lang ang tangi kong pinagdarasal.

Oras... Lumipas ang oras, araw, at buwan

Nagulat na lang ako nang ako’y biglang iniwan.

Nalaman kong ika’y bumalik sa iyong dating kasintahan,

Nasampal ako sa katotohanang ako’y pampalipas-oras lamang.